18 Junie 2007

Vadersdagnaweek: 15-17 Junie


Dit was 'n gesinsnaweek, met al2 ons gesinne om die beurt. Die Doorduin-ouers het 'n bietjie meer van ons tyd gekry, van Vrydagaand-Sondagoggend, maar ons het woes gekuier met die Dool-kant Sondagmiddag om op te maak.

By Pringlebaai is ons bederf deur Pa Arend Vrydagaand met 'n alles-uit-pa-se-hand aandete. Al wat ons mog doen is om wors te braai; die gebraaide aartappels en wortel-roerbraai was sy afdeling. Selfs die koffie en die skottelgoed het hy self hanteer. Gelukkig het ons darm 'n vadersdag-geskenkie gebring ('n bottel Amaroela) wat 'n goeie afsluiting vir 'n gesellige aand was.


Saterdag was 'n skitterende stil sonskyn dag, en ons is Bettiesbaai toe om te gaan kyk hoe lyk die branders. Daar gekom bespeur ons toe 'n bekende wit Tazz met CEO registrasienommer, en Riaan is die see in om almal te gaan groet daar in die agterste linnies. Ek het maar op die strand gebly en die sleutels opgepas, aangesien net een van die borde surfbaar was op daai stadium. Ek moet sê die surfie was van korte duur, en ek was darm nie te lank alleen nie. Lyk of al die surf-spiere nog nie weer op standaard is na die troue en lang heuningmaan nie! :-)

Saterdagmiddag, aand en Sondagoggend verder bederf met lekker kos en goeie geselskap in die Doorduin-gastehuis. Ons het selfs sop, pampoenkoekies, sjokolades, blomme en marshmallows vir hot-chocholate aande saamgekry!


Sondagmiddag was dit kuier met die van den Dools, van den Dool-to-be, en die Natrasse. Dit was 'n lekker vadersdagkuier, en Pa Gerrit het omtrent 'n arm vol geskenke gekry - van kerrievis tot 'n boek oor die geskiedenis van Durbanville! Na 'n heerlike Argilla-ete deur Ma Marti (sjoe dis al wat ons doen deesdae - eet!) en poeding uit 'n blik en 'n boks en koffie uit RD se hand, het ons die res van die middag op ons sitvlakke, stuitjies en rue verder in die sitkamer verwyl. Die weer was ook al teen die tyd weer sleg, so 'n middagstappie was ongelukkig buite die kwessie. Ai! Die Doorduine moes weer 5uur se kant die lang pad na Malmesbury aanpak, want glo dit of nie, daar was NOG kombuiskaste om te gaan klaarmaak.

O ja, en net weer die naweek besef: Ons het fantastiese vaders!

13 Junie 2007

Kaste-bou naweek: 8-10 Junie




My skoonpa reken 'n krat-stelsel waar mens aanmekaar 2 of meer kratte van mekaar af moet haal om by jou borde, potte en panne uit te kom, is net die ding vir 'n kombuis. Ek dink dit het iets te doen met sy liefde vir blomme en die feit dat die kratte waarvan hier gepraat word, blombolkratte is, so ek het nou nie te hard gestry nie. Ek stem egter glad nie saam nie. Dit het seker sy voordele, ek meen mens bou darm bietjie spiere elke slag as jy 'n swaar krat afhaal. En ten minste is dit in 'n netjiese stapel met 'n plank bo-op. Ek het egter gereken dat 'n slim ingenieur soos my man darm seker 'n effe meer gebruikersvriendelike stelsel kan ontwerp, en so het dit dus gekom dat ek hom sover gekry het om 'n naweek by die huis te bly en kaste te bou. Nee, ek het nie geneul nie. Net 3 keer 'n dag mooi gevra.

Dit was darm nie 'n vervelige naweek nie. Wim en Cia en Cebella het Saterdag heerlik by ons gekuier, en ons emosioneel ondersteun. Ons het ons nuwe Weber vir die tweede keer gebruik, en 'n GROOT pizza gemaak met skoonouers se pizza-plaat. Tip: wag tot die vuur effe koeler is en versprei die kole eweredig, tensy jy van gebrande pizzakors hou! Jaco het later die middag by ons aangesluit en tot Sondagmiddag gebly. Hy is effens misbruik, want twee pare hande i.p.v. een is darm baie handig as mens kasbou. Maar ons het darm vir hom kosgegee, en 'n lekker dubbelbed met 'n (nuwe) handdoek en 'n (nuwe) kombers en 'n hollandse tjoklit (jie).

Uiteinde van die saak: Ek het kombuiskaste! Ek is baie hêppy en nou kan ons maar komende naweek gaan pret hê!